Heb 12 | KYG | STEP | Ani asole vaya'mogimo apakesa afi'a fatago hu'naya kava'mo ali'a lave li'naya vaya'mo falite'apae'mo hiyakana hu'a mai'ne'a fai'a vego hu'a mai'ne'a ali'a folagapi'mo late'a mai'ne'a aulu lahae'a lage'a ne'maiye. Aulu lahae'a lage'a mai'naya'mofe'mo lagaemo ne'aluna kanamo ataleta latafausiya hosu kava'mo hatu maeta ataleteta o'ataleta atafauta alagi huta mai'neta valino late'niya kate'mo nagu nagu huta vigetao.

Hebrews 12

Yesufeke'mo lagesamo afigetao, huno hu'niya gemae

1 Ani asole vaya'mogimo apakesa afi'a fatago hu'naya kava'mo ali'a lave li'naya vaya'mo falite'apae'mo hiyakana hu'a mai'ne'a fai'a vego hu'a mai'ne'a ali'a folagapi'mo late'a mai'ne'a aulu lahae'a lage'a ne'maiye. Aulu lahae'a lage'a mai'naya'mofe'mo lagaemo ne'aluna kanamo ataleta latafausiya hosu kava'mo hatu maeta ataleteta o'ataleta atafauta alagi huta mai'neta valino late'niya kate'mo nagu nagu huta vigetao. 2 Yesufeke'mo aulu haelita nagu nagu huta vigetao. Agaeke'mo lagesa afita fatago nehuna kava'mo alino aepa fai'niyanageno alino hano huno atesiya vekamo mai'niye. Agaemo, lusi kava hu'na namogaga aiguve, huno agesamo afi'neno'ae'mo malipu yosale'mo falisiya kavatefe'mo o'ataleno atafauno alagi huno mai'neno fali'niye. Malipu yosale'mo falisiya kavafe'mo lusi kava huno navagage hugiye, huno huteno agesa ala'amo o'afi'nifa, kanalene, huno faliteno'ae'mo haino Goti'a yagaino ne'apateya sia'ale'mo lamaga haopale'mo fai mai'niye. 3 Hosu vaya'mogimo apaini hu'a ate'naya kavafe'mo lapakesa afifi hutapa maiyo fiku yanageno alaga'mo lapaesigetapa lapaipamo'mo kana nehinagetapa atalegayanagi.

4 Hosu kavafe'mo kame hutapa ne'atage'apae'mo kamiti olapamagi'naya'mofe'mo o'ataleta kame hutapa ateyo. 5 Lapakaemo Goti mafa'ne'amo mai'nageno'ae'mo Goti'a lapaipamo alino lokiya vaino atesiya agufa gemo hiyo huno hu'niya gemo ago lapa pai'niyana lapake kani'niye. Ani gee'mo huno'ae'mo,

Mafa'ne'nimogae, huno, Ala kava ne'mo'a alino api aino nekateno kayo'mo kamisigekae'mo, ina agufa kavane, huka kagesamo o'afiyo. Ani kava huno ge kahausigekae'mo kaipamo'mo kana osino. 6 Ala kava ne'mo'a muki vaya'aife'mo hau ayamopafi'mo nehaiya vaya'mo kayo'mo ne'apamiye. Agaemo muki vaya'amo agaetegamo ne'ageno'ae'mo alino falu fala huno ne'apateno'ae'mo, mafa'ne'nimo mai'nae, huno hapa nepaiya vaya'mo kayo'mo ne'apamiye,
huno hu'niye. 7 Lapakaemo kanamo ali'netapae'mo o'ataletapa atafauta alagi hu'netapa ne'visayana agai'a mafa'ne'alegamo nehiya agufa kava'mo nehiye. Afo'apimogi muki mafa'ne anaga'apimo kayo'mo ne'apamiye. 8 Goti'a muki mafa'ne'amo kayo'mo ne'apamiya'mofe'mo kayo'mo nolapamisiyana mafa'ne'amo o'mai'nafa megusa mafa'negana hutapa ne'maiye. 9 Ma mopafi afotimogimo ali'a api ai'a late'nagetae'mo apaiyafi'mo mai'none. Launelame'mo Afotimo'e'mo mago'e huta aiyafi'mo maigetao alagepa huta maigunanagi. 10 Ma mopafi afotimogimo apakesafati'mo afi'a aise afina'mo kayo'mo lami'naya'monanafa agaemo alagepa kava'age'mo huta agaekana huta laote vaya'amo maisunafe'mo laha maeteno kayo'mo nelamiye. 11 Goti'a kayo'mo nelamigetae'mo, lamogaga ne'auna kava'mo ohane'nifa lagafu nekiya kava'mo hane'niye, huta lagesamo ne'afuna'monanafa Goti'a kayoteti'mo alino laya malesigetae'mo henaga'amo laipafati'mo fatago kava'mo'a alagagana huno aesigeta laipamo'mo falu hugiye. 12 Inagi lapaya'mo'mo alaga'mo nehaegeno lapaiyamo'mo atete nehigi alitapa lokiya vaita ateyo. 13 Api kate'mo vigeno'ao lapaiyamo afe le'niya lapaiyamo au'amo alino api aino alino alagepa huno nelapateno alino lokiya vaino lapateno.

14 Lapakaemo muki vaya'e'mo alagepa huta magokepi lokaeta mai'netapa aote kava'mo alisayafe'mo nagu nagu hutapa vegala aeyo aote kava'mo o'ali'nisaya vaya'mogimo Ala kava ne'mo o'agegaya'mofe'mae. 15 Fiku yanage'a mago konagatapimogimo Goti'a fiku hapa maeno ne'apamiya kavate'mo hai'a metalegayanagi kava yagaitapa maiyo. Fiku yanageno hafu'yafati'mo ausisi aeteno hosu atu neheya ya'mo afole aiteno hanageke ya'mo alino lapamiteno asole vaya'mo alino hosu huno apategaiyanagi yagaitapa maiyo. 16 Iso'a kumai kava'mo huge mono osuno aote kavafe'mo, afa kava'mo hane'niye, huno huge huno mai'niye. Isokana huno mai'nisiya vekamo lapakae'e'mo o'maisiyafe'mo kava yagaitapa maiyo. Iso'a yege mafa'nemo mai'niya'monanafa aise ne'ya'mo miya faisiyafe'mo yege mafa'nemogi ne'aliya ya'mo ha maesiya ya'amo fiku ago atale'niye. 17 Henaga'amo afo'amo'mo yege mafa'nemogi ne'aliya milesimi gemo Goti'a ha maesiya agufa milesimi gemo ha paisiyafe'mo hau'niya'monanafa afo'amo'mo ha opai'niye. Ha opai'nigeno'ae'mo aunumo emine ne'egeno avi'ya nehuno'ae'mo aukaya huno ge hu'niya'monanafa aipamo alino afe lesiya ka'mo alagi ohane'niye.

Lole kotalake gelafe'mo anava gemo hu'niya gemae

18 Akeya'vilagamo Isaleli vaya'mogi atafa kotalake gemo afisayafe'mo avemo agi'amo Sainai avemo aiyafi'mo u'a mai'nayana lapakaemo ame alisaya avele'mo etapa o'mai'nae. Ani avefi'mo alopa atamo kae'nigeno lusi hani hu'nigeno'ae'mo lusi yasimo ali'nigeno pikulimo hu'nigeno lokiya gemo hu'niye. Ani gemo nehige'apae'mo Isaleli vaya'mogi afite'apae'mo, kahao ke honanagi, mago'e huno ani gemo laha opaino, hu'a ha pai'nae. 20 Goti'a,mani avele'mo mago vekamo'a eno ame alige afumo'mo eno ave aiyafi'mo ame alige nehisigetapae'mo yafa kayoteti'mo amagigegeno falige keveleti'mo haegeno falige hino, huno hapa pai'niya'mofe'mo lusi kava hu'a koli hu'nae. 21 Agete'apae'mo lusi kava hu'a koli hute'a apamo'ya ai'nageno'ae'mo Mosese'a,lusi kava hu'na atete nehu'na koli nehuve, huno hu'niye.

22 Lapakaemo Sainai avele'mo o'me'nafa Saiyoni kotega avemo koku'napi Yulusalemu taonifi'mo yalagisa Goti'a ne'maiya taonifi'mo tauseni tauseni'a enisole vaya'mo ne'maiya taonifi'mo etapa mai'nae. 23 Goti'a yege mafa'ne'amogi apaki'apimo koku'napi'mo avo'mo kae male'niya vaya'mo ali'a anupa hu'a mai'ne'a apamogaga ne'aiyategamo etapa mai'nae. Lapakaemo Goti'a muki vaya'mo alino fako huno ne'apateya vekalegamo e'nae. Fatago vaya'mo alino alagepa huno apate'niya vaya'ai apaune'apametegamo e'nae. 24 Yesu'a folagapi vekamo saufa kotalake gemo hu male'niya vekalegamo e'nae. Kola'aleti'mo aino fuli fuli huno faleno apate'niya kola'alegamo e'nae. Ani kola'amo'mo Evo kola'amo ago aeno agase'niya'mofe'mo hosu kavafe'mo ge nosifa alagepa kavafeke'mo ge nehiye.

25 Inagi ehetapiye, ge nehisigetapae'mo ge'amo amagita o'ataletapa ge'amo alagepa hutapa afiyo. Goti'a ma mopafi Sainai aveleti'mo ge hu'nige'apae'mo ge'amo o'afi'a amagi'a atale'naya vaya'mo ae'a kasalo opae'naya'mofe'mo koku'napati'mo ge nehisigetae'mo o'afita lakame'ya ne'amisunana haiya kava huta aeta kasalo paegaune. 26 Goti'a akeya'vilagamo ge hu'nigeno'ae'mo imima ali'nigeno ma mopamo'mo kanage kanage hu'niya'monanafa hemeni afinatefe'mo lapa maegauve, huno hu male'niya gemo'mo huno'ae'mo,halate mopa'age'mo ali'na kanage kanage hu'na o'ategaufa koku'na'e'mo ali'na kanage kanage hu'na ategauve, huno hu male'niye. 27 Agaemo,halate, hu'niya gemo aepa'amo hane'niyana alino kanage kanage osisiya kava'mo no'agona kava'mo hanesiyafe'mo alino kanage kanage hisiya kava'mo apayateti'mo alo hu'naya ya'mo ne'agona ya'mo alino atale'niye, huno alino lave li'niye. 28 Goti'a kini vaya'mo alino hamaleno late'nigeta kini vaya'mogi ne'aliya agufa alagepa ya'mo ali'nonanageta alagepa huta maige maige huta maigune. Ani kava'mo'a kanage kanage osugiya'monanafa hanege hanege huno nehaneno haneno hano osuno afa'a hanegaiye. Ago lami'niya'mofe'mo hao ke neheta Goti aiyafi'mo mai'neta koli hu'neta mono higetao. 29 Gotitimo'mo atafi'mo kageno leno asaga neliya yakana huno mai'niya'mofe'mae.